గణతంత్ర దినోత్సవం, రాజ్యాంగ ప్రాముఖ్యత

జనవరి 26 గణతంత్ర దినోత్సవం ఎందుకు జరుపుకుంటారు చాలామందికి తెలియదు.

200 సంవత్సరాలు బ్రిటిష్ బానిసత్వ సంకెళ్ళ నుండి భారత జాతి విముక్తమైంది. 1947 ఆగస్టు 15న మనకు స్వాతంత్రం వచ్చింది. ఆ రోజున జండా ఎగరవేసి ఉత్సవాలు చేసుకుంటాం. అయితే బ్రిటిష్ వాళ్లు వారికి అనుగుణంగా ఉండే సంస్థలను రూపొందించుకున్నారు. మతకల్లోలాల వల్ల దేశ విభజన జరిగింది.
సంపూర్ణంగా మనలను మనం పరిపాలించుకునే ఒక వ్యవస్థ మనకు లేదు.
దీర్ఘకాలిక లక్ష్యాలు నిర్దేశించుకోవడానికి మనకంటూ ఒక రాజ్యాంగం కావాలి. చాలా క్లిష్ట పరిస్థితులలో భారత రాజ్యాంగానికి రూపకల్పన జరిగింది. అందు కొరకు ఎన్నికైన ప్రజాప్రతినిధులతో ఒక రాజ్యాంగ సభ ఏర్పాటు చేయబడింది. 299 మంది సభ్యులతో రాజ్యాంగ సభ మొదటి సమావేశం 1946 డిసెంబర్లో జరిగింది. డాక్టర్ బి.ఆర్ అంబేద్కర్ గారు రాజ్యాంగ నిర్మాణంలో ప్రధాన పాత్ర పోషించారు.

రాజ్యాంగం అన్నది దేశాన్ని ఎలా పరిపాలించాలి, చట్టాలు ఎలా చేయాలి, వాటిని ఎలా మార్చుకోవాలి, ప్రభుత్వం ఎలా ఏర్పడుతుంది, దీనిలో ప్రజల పాత్ర ఏమిటి, వాళ్ళ హక్కులు ఏమిటి, వంటి విషయాలను కలిగి ఉంటుంది.

అంబేద్కర్ గారి అధ్యక్షతన ముసాయిదా కమిటీ ఎన్నోసార్లు సమావేశమై చర్చలు జరిపింది. ఎన్నో సవరణలు ప్రతిపాదనలు వచ్చాయి .7635 సవరణలు ప్రతిపాదనలో, 2475 ప్రతిపాదనలను పరిశీలించి, మార్పులు చేర్పులు చేసిన అనంతరమే భారత రాజ్యాంగ వ్రాత ప్రతి తయారుచేయబడింది. అంబేద్కర్ గారు చైర్మన్
గా ఏర్పడిన డ్రాప్టింగ్ కమిటీ రాజ్యాంగ ముసాయిదా ప్రతిని తయారు చేసింది. దీనిపై మూడు సంవత్సరాల కాలంలో 114 రోజులపాటు ప్రతి అంశంపై సభ్యులు చర్చలు జరిపారు. రాజ్యాంగ సభలో మాట్లాడిన ప్రతి మాటను నమోదు చేసి, భద్రపరిచారు. వీటిని రాజ్యాంగ సభ చర్చలు అంటారు.

మన రాజ్యాంగ రచనకు రెండు సంవత్సరాల 11 నెలల 18 రోజుల సమయం పట్టింది. అతి పెద్ద లిఖిత రాజ్యాంగం. దృఢ అదృడ లక్షణాలతో ఉన్నది. అవసరమైతే మార్పులు చేర్పులు చేసుకోవచ్చు. కొన్ని కొన్ని అంశాలలో ఎటువంటి సవరణలు చేయడానికి వీలు లేదు.

మన రాజ్యాంగంలో ఇప్పటివరకు మొత్తం 25 భాగాలు (పార్ట్స్) 448 నిబంధనలు (ఆర్టికల్స్) 12 షెడ్యూల్స్ ఉన్నాయి సెప్టెంబర్2023 వరకు 106 సార్లు సవరణలు చేయబడ్డాయి.
1949 నవంబర్ 26న రాజ్యాంగాన్ని ఆమోదించారు.కాబట్టి ఆరోజు
నవంబర్ 26న రాజ్యాంగ దినోత్సవం గా జరుపుకుంటున్నాం. 1950 జనవరి 26న భారత రాజ్యాంగం అమల్లోకి వచ్చింది. ‘సర్వసత్తాక సామ్యవాద లౌకిక ప్రజాస్వామ్య గణతంత్ర రాజ్యాంగ’ భారత్ అవతరించింది. ఈ సందర్భంగా నే మనం ప్రతి సంవత్సరము జాతీయ జెండాను ఆవిష్కరించి గణతంత్ర దినోత్సవాన్ని జరుపుకుంటున్నాము.

భారత రాజ్యాంగ పీఠికలో “భారతదేశ ప్రజలమైన మేము భారతదేశాన్ని గణతంత్రంగా ఏర్పాటు చేయడానికి తీర్మానించి దేశ ప్రజలందరికీ న్యాయం, స్వేచ్ఛ, సమానత, సౌబ్రాతత్వం ఇస్తూ మాకు మేము ఈ రాజ్యాంగాన్ని ఇచ్చుకుంటున్నాం” అని ఉంటుంది. స్వాతంత్ర పోరాట స్ఫూర్తి మార్గదర్శకంగా నిలిచిన విలువలే ప్రజాస్వామ్యానికి పునాది. ఈ విలువలే రాజ్యాంగ పీఠికలో పొందుపరిచారు.( ఇది సంక్షిప్తంగా మన భారత రాజ్యాంగం గురించి)

స్వాతంత్ర దినోత్సవం నాడు జెండాను ఎగరవేస్తాము. జెండాను ప్రధానమంత్రి ఎగురవేస్తారు. గణతంత్ర దినోత్సవం నాడు జెండాను ఆవిష్కరిస్తాము. ఈ ఆవిష్కరణను రాష్ట్రపతి చేస్తారు.

మనకు స్వాతంత్రం సిద్ధించిన తొలినాళ్లలో కనీసం మనకు
గుండు పిన్ను కూడా తయారు చేసుకునే టెక్నాలజీ లేదు. ఈరోజు శాస్త్ర సాంకేతిక రంగాల్లో దేశం ఎంతో పురోగతిని సాధించింది ప్రపంచ దేశాలలోనే ఆర్థిక రంగంలో ఐదవ దేశంగా నిలిచింది భారత్ అతి తక్కువ ఖర్చుతో చంద్రయాన్ ప్రయోగాలు విజయాలు మనకు గర్వాన్ని స్ఫూర్తిని కలిగిస్తుంది.

ఇదంతా నాణానికి ఒకవైపు మాత్రమే! మరోవైపు ఈనాడు స్వాతంత్ర దినోత్సవ అవగాహన కానీ, గణతంత్ర దినోత్సవ ప్రాముఖ్యత కానీ, ప్రజలకు తెలియకుండా పోతుంది. ముఖ్యంగా నేటి యువత సరదాగా గడిపే సెలవుదినంగా వీటిని భావిస్తున్నారు. ‘చిన్నినా బోజ్జకు శ్రీరామరక్ష ‘అనుకుంటూ ఏమి పట్టనట్టుగా ఉంటున్నారు. ఈ ధోరణి మారాలి. హక్కులు అనుభవించడమే కాదు. బాధ్యతలు నిర్వర్తించాలని ,ప్రతి ఒక్కరూ గుర్తించాలి. సామాజిక సృహతో, బాధ్యతగానడుచుకోవాలి. ఆ దిశగా మన అడుగులు పడాలని ఆశిద్దాం.
జైహింద్. (పాఠ్య పుస్తకాల ఆధారంగా రాయడం జరిగింది)