కాలమా ఓ కాలమా
కదలిపోకుమా!
కరడుగట్టిన ఎదనీది
కన్నీరెరుగదు
కానివారని ఆదరించక పో
కనికరమే లేదు అయిన వారని.
కాలమా ఓ కాలమా
కదలిపోకుమా!
కనులు లేవనీ కానరాదనీ
కంటికి గంతలున్నాయనీ
కుంటిసాకుల
కాలవాలమైన
కాలమా ఓ కాలమా
కదలిపోకుమా!
కాటేయటమే నీధ్యేయం
కరుణే లేదు కారణం
కనులువిప్పి
కంటితడి స్పర్శించు
కాలమా ఓకాలమా
కదలిపోకుమా!
కడగండ్లకోర్చి
కలల దరిచేరబోవ
కర్కశపునీ కోరల్లో జీవాత్మ అలమటించ
కాలమా ఓ కాలమా
కదలిపోకుమా!
కనురెప్పపాటు ఆలోచించు
వడి వడి అడుగులు ఆపి
కడవరకు ఆగుమా!
(ఎన్నోఅవాంఛనీయ సంఘటనలలో అశువులు బాసిన చిన్నారులు,యువత,పెద్దవారికి అశ్రునివాళి.)